Med pappa Sigurd Salvesen som trenar og primus motor, var Jannik med på oppstarten av jentefotballen i Honndalen. Ho markerte seg som eit stort keepertalent, noko som m.a. gav henne FjordingeN-CupeN sitt stipend. Det var i 1982 vi starta opp jentefotball med spelarar i hovedsak fødde i 1969, 70, 71, og 72. 70-gjengen var nok største gruppa, der så godt som alle jentene i klassen var med, minnest Jannik.
-Hugsar du første kampen?
Det var mot Sunnylven på Hellesylt. Vi tapte enormt, 9-0 om eg ikkje hugsar feil.
-Etterkvart vart det betre opplevingar?
Ja, sigeren i Sunnmørscupen står som eit høgdepunkt. Anne Otterdal scora i ekstraomgangene og vi kunne ta med pokalen heim til Honndalen. Stor stas.
Eg minnest også FjordingeN-CupeN der eg vart kåra til beste spelar. Stod i mål i ein diger søylepytt på Stryn Stadion. Slengde meg i alle retningar – møkkete og søkk våt.
Bak frå venstre: Jannik Salvesen, Asbjørn R. Sunde og Hege Høgalmen. Framme frå venstre: Even Kroken (også frå Hornindal), Geir Inge Rake, Ole Petter Hoff og Johan Sigrudsson. Foto: Fjordingen.
-Andre ting du kan nemne?
Sabadraktene! På denne tida delte SABA i Tønsberg ut gratis drakter mot reklame. Hugsar det var mykje om og men korvidt vi skulle spele med desse draktene. Men vi heva oss over kommentarane og køyrde på☺️
Elles hugsar eg godt bussturane i den gamle idrettslagsbussen, ofte med Anders Støverstein bak rattet. Og alle gongane pappa køyrde heim mange av spelarane i sin gamle og utruleg stygge Datsun. Stappa inn rubbel og bit, bygde opp i høgda. Alt anna enn lovleg.
-Kva betydde fotballen for deg før du og familien flytta frå Hornindal?
-Fotballen var samlande og skapte fellesskap. Eg er min far evig takknemlig for at han tok på seg oppgåva med å starte jentefotballen i Honndalen og var så oppofrende for oss alle.
