Irene byrja med fotball på seniornivå, då her ikkje var jente/damefotball i hennar oppvekst.
-Eg starta med fotballtrening på Eid då eg gjekk på gymnas. Men Margun, Stine Grodås og eg melde oss inn i Sunnylven og spelte nokre sesongar der før Hornindal begynte med damelag. Så var eg aktiv innimellom fødselspermisjonar… og spelte min siste kamp då eg var 37 år på lag med mellomste dotter Marte. Siste åra var eg med kun som kriseløysing då dei ikkje klarte stille fulltallige på kamp.
-Ditt beste fotballminne frå tida i honndalsdrakt?
Opprykket til 1.divisjon. Men foranledninga var at vi tapte opprykkskampen mot Florø på hausten. Vi leia 5-0 og tapte. Eg laga sjølvmål og heada inn 6-5 målet til Florø. Men dei ville ikkje rykke opp, og vi fekk plassen. Så det enda godt! Møtte mange gode lag i Bergensområdet, og rykka ned att året etter.
-Eit anna høgdepunkt?
Deltaktig på Norway Cup. Flott oppleving sjølv om vi rauk ut i 16.delsfinale mot Clausenengen i straffekonk.
-Ei oppleving som sit klistra i minnet?
Vi slo ut Kaupanger i fylkesfinale i KM innendørsfotball og gjekk vidare til Stavanger, der vi møtte Klepp og Sandviken. Tapte begge kampane. Turen til Vigra var ein opplevelse i seg sjølv på vinterføre. Odd Løvlid og Per Are Verlo køyrde kvar sin bil. Vegen var islagt, så når vi skulle ta av i rundkøyringa på Blindheim for Per Are i brøytekanten til høgre. Odd like bak tok sikte på midtrabatten. Der stod vi og skulle nå eit fly…. Vi fekk hjelp av brøytemannskap som tilfeldig kom forbi.
-Andre ting du ønskjer å fortelje frå di lange fotballkarriere?
Vi var på bortekamp ute i Leikanger på ei grusbane. Vår gode ving Britt Tomasgard kom på raid mot mål og vart felt. Ho vart så irritert at ho tok ein neve grus og kasta på syndaren. Dermed direkte rødt kort.
I ein heimekamp mot Bremanger skulle eg dekke opp deira stjernespelar Anette Igland. Ho var så rask at eg tenkte eg skulle ligge tett på henne, men ho stakk ifrå meg når ho fekk langpasningar. Så la eg meg lenger frå, men då fekk ho ballen i beina og stakk ifrå då og. Håplaus oppgåve for meg. Ja vi tapte!
-Beste medspelar i honndalsdrakt?
Vanskeleg å velje mellom mange gode som eg fekk spele saman med gjennom åra. Oddrun Kristin Haugen, ei klippe i forsvaret, Kirsti Frøysadal og Hilde Sætren – kjappe og gode angriparar, Nina Flo – dyktig og hardtarbeidande.
-Nokon i klubben du set ekstra høgt?
Her må eg nemne fleire; trenarane Ole Magnar, Ola Roar, Per Are, Ståle og ikkje minst vår fantastiske oppmann gjennom mange år Odd Løvlid.
-Kva har Honndalsfotballen betydd for deg?
HIL fotball har betydd mykje for meg frå tidleg barneår. Var fast inventar på kampar då far var med, og sidan når søsken, eg sjølv og våre barn spelte.
Fekk mange gode venner gjennom fotballen, delte gode opplevingar.
Eit flott miljø å vere i, er glad i aktivitet og spenninga som fotballen gir.
